&روايه اسمهان وعبد الرحمن&

تذكير بمساهمة فاتح الموضوع :

جيت بقصة جديدةحلوه وشيقة و مضحكة في نفس الوقت
عل وعسى أحد يبتسم :D منكم وأكسب أجره!!
عاد ياشين النكد واللي يصنعونه ويتفننون فيه!
لذا قلت لنفسي في هذه الظروف السيئة اللي نعيشها خل ننافس شركة الاتصالات اللي فتحوا لنا شهررسايل(نصية+وسائط)بالمجان!
وأوزع أنا عليكم بعد ضحكات بالمجان!!
المهم كان وياما كان....والحياة مليانة سكان
وبشرمن مختلف الألوان
وأبطالنا اليوم اسمهــــــــان
وزوجها اسمه عبدالرحمن!
كل واحد بطبع مختلف...لما جاء عبدالرحمن يخطب قبل كم سنة كان شرطه الأساسي لأمه إنه يبغى وحدة صغيرة والسبب إنه يبغى يشكلها على كيفه!!(على باله عجينة فطايربدقيق كويتي!! اصحى يابابا بنات هالوقت يعجنونك ويخبزونك بتنور!!)
بالرغم انه عمره مو صغير30 سنة!!
وعاد أمه لبست عباتها وصارت تدوج من عرس لعرس تصيد البنات اللي بالطعشات(الترجمة اللي أعمارهم شي وعشر)!
لين لقت له حبيبة القلب اسمهان وعمرها 17 سنة طالبة بثاني ثانوي..خفـــــــــيفة بس تتثيقل!مايخالف الثقل صنعة!!ونوعاً ما راعية مقالب!(نوعاً ما؟؟ ولا نوعاً شاي؟؟)هههههه
المهم لما اتصلت أمه تخطبها بغت اسمهان تتشقق نصين من الفرحة!!قالت يالله فكة من ثالث ثانوي
بلا دراسة بلا هم!!!
ومسكتها أختها الكبيرة اللي متزوجة من سنين وقعدت توصيها الوصايا العشر!(وعاد هم صدق أخوات بس ياحبهم في المناقر24 ساعة على الطبيعة وفي التلفون وفي المسجات وبكل مكان !!!)وكان اسمها(أسماء) وقالت:
اسمعي يااسمهان بكرة جاية تخطبك حرمة لولدها
لاأوصيك الله الله بالعقل والثقل وأول شي لازم تسوينه تحسنين مشيتك!وانتي من شافك يحسبك فنانة رقص شرقي!ياكافي من تمشين يهتز كل شي فيك!!!
اسمهان:لو شاطرة قلديني!
أسماء:لا شكراً.. من رقص نقص!!!
أمهم:أهم شي يااسمهان الله يستر عليك حفلة الألوان اللي تحبين تسوينها بوجهك قبل كل طلعة مانبيها!!!!الحرمة جاية تخطب مو جاية تاخذ دورة تجميل!!!
اسمهان:المكياج ضروري لإبراز جمال الوجه!
أسماء:مو لما يكون فيه جمال من الأساس!!!!
اسمهان:استغفرالله ...صدقيني كل ماناظرت وجهك حسيت اني قاعدة مع جدتي الله يرحمها ماينشاف عليها إلا كحل أبوحجر!
أمهم:أقول أص الله يصلحكم بس! ماأخس من المربوط إلا المفتلت!!
أسماء:لاتضيعين الموضوع ياست اسمهان!
صدق ماله داعي تحطين ماكياج يعطيك عمر أكبر ويعطي اللي قدامك احساس بإنك طايرة على الزواج!!!
اسمهان:واشفيها لاظنوا الناس اني طايرة على الزواج؟!!هاه؟الزواج عيب ولا حرام..؟! أتحدى انه في بنت ماودها تتزوج!!!
أمهم:استحي استحي الله لايفضحنا!!وش هالكلام يابنت؟!!
اسمهان:الحق حق ياجماعة!مافيه ناس جايين يخطبون الا وودهم توافق العروس...وأنا موافقة!
التفتت أسماء لأمها وقالت: ماقلت لك يايمه هالبنت مامنها رجا؟!!طقاقة ويخب عليها بعد!!
اسمهان:هههههههههههههها
والله مرة تفشلون صدقتوني قاعدة أتغشمر!!اللي بعده اللي بعده يامدام أسماء!
أسماء:واللبس لاأوصيك لازم يكون ساتر!
اسمهان:أكيد وعازل للضوء والصوت صح؟!!
أسماء: ياخفة دمك!!شوفي بعد أهم نقطة لاتقعدين طول الوقت مع أمي ان جت الحرمة بس ادخلي اقعدي شوي عشان تتمقل فيك المرة زين ثم اخرجي....وارجعي صبي القهوة واطلعي شوي وارجعي باشري من الحلى على المرة وهكذا دواليك!!!!!
اسمهان:لا والله!!!احلفي بتشغليني مخدمة قصور؟؟!!
أمهم:صادقة أختك لاتعاندين!
اسمهان: مادام الدعوة كذا أجل ليش جاية المرة تخطبني لولدها تروح تخطب له أقرب فليبينية تراهم شاطرين في المباشرة!!!!
.....
........

.....
طبعا بعد مااسمهان طنقرت وقالت خل أمه تخطب له أقرب فليبينية!!
ردت عليها أسماء وقالت:فكرة تهبل !!ليش يايمة ماندله على (كاتيا) شغالتنا...يمكن نكسب فيها أجر وتعلن اسلامها على إيده!!!!!
اسمهان:لعن الله ابليسك!!إلا قولي ليش ماندل زوجك انتي على كاتيا..ونكسب فيه أجر مسيكين!!! على الأقل كاتيا بشوشة ومرحة مو لسانها برة 24 ساعة مثل بعض ناس تقولون حية!!
عاد الأم قامت تضحك...وقالت:الله لايحرمني من هبالكم يابناتي!!
أسماء:يمة مدري شلون مستحملتها هالسوسة؟!
أنا أقترح تعجلون زواجها بأسرع وقت خل نفتك من هذرتها!!
اسمهان:آميــــــــــــــن!! ايه يمة تكفين اسمعي كلامها!أول مرة في حياتها تقول شي صحيح!!
الأم:يااسمهان عيب عليك يابنتي اركدي شوي!!
اسماء:ماتنلام يمة تخاف إن طار مايجي غيره!!
الأم: اش دعوى؟! أصلا بعدها صغيرة..ماله داعي نستعجل عليها...لكن مواصفات العريس شجعتني أقابل أمه...ومو شرط يصير شي هالحين يمكن بعد كم سنة!!
اسماء:إلا غريبة على طفاقتك ياست اسمهان ماسألتي عن اي شي؟يعني لاقلتي مين دلهم علينا؟ ولا من أي قبيلة؟ولاعن وظيفة العريس ولاعمره؟ولا اسمه حتى!!!
اسمهان: وإش لي باللقافة يختي!أهم شي جاني عريــــــــــــــــــــــس!إلا صدق يمة اش اسمه؟!
الأم:خمني!!
اسمهان:طيب ساعديني يبدأ بأي حرف؟!
الأم: حرف العين!
اسمهان:عباس؟!!
الأم: لا!
اسمهان:عادل؟!
الأم: لا!
اسمهان:عدنان؟!
اسماء قالت: لااا اسمه عبسي ياست اسمهان!!
وقامت الأم تضحك!!!وقالت:لا!
اسمهان:يمة لاتقولين اسمه عيد!!ماأحبه هالااسم!
الأم: لا تطمني مو عيد!
اسماء:بس عاد تراكم زودتوها!!الأم وبنتها يلعبون فوازير رمضان!!ابسطي ياست اسمهان اسمه لايق على اسمك...اسمه عبدالرحمــــــــــن!
اسمهان: حسافة!!كنت أتمنى لو كان اسمه رائد أو ياسر أحسه أكشخ!!!
اسماء: ايه ولو بعد كدش والبنطلون طيحني بيطلع أزين!!!
اسمهان: أعوذ بالله!!لاتفاولين...هالأشكال ممكن نشوفهم بالأسواق ونضحك من باب الترفيه لأن شعورهم وبناطيلهم مثل مهرجين السيرك إتز أوكيه!! أما نتزوج من نفس هالطقة نو ويــه!!
الأم: شوفي يااسمهان ترى ام المعرس شايفتك قبل.. في زواج بنت خالك لأنها من جماعة زوج بنت خالك..
وسألت عنا وكونت فكرة بعدين اتصلت وعطتني معلومات عن ولدها!
اسمهان (بشغف):اش قالت يمة؟!
الأم:قالت ان ولدها موظف في احدى الشركات وراتبه زين....و
.......

المهم الآنسة اسمهان قاعدة تسمع من أمها بشغف وعقلها يسافر لبعـــــــــــــيد في دنيا الأحلام....تحلم بالعريس اللي يجي يخطفها بشبح أسود ويفلسع بها لأقرب ديرة أوروبية!!!
الأم:اللي عجبني في هاالولد يااسمهان اني سألت عنه بنت خالك وسألت أهل زوجها عنه والكل مدح فيه وفي أخلاقه...كون نفسه بنفسه وساكن بحلال أبوه الله يرحمه,,وأمه ساكنة بدور مستقل ووظيفته وأحواله المادية مستقرة..يعني إلى الان الأوضاع مطمئنة...
اسمهان(وبتفكير طفولي ساذج)قالت:ياترى في أي حي بنسكن؟ ولأي بلد بنسافر؟وبأي مكان بيسير زواجنا!!!!!!!!!!!
أسماء:هيييييييييييييييييه انتي!!
ستوب!!على طول رسمتي على الرجَّال وصممتي مشاريع؟!! ترى السالفة لسه فيها أخذ وعطا!!
يمكن ماتعجبينه!ويمكن يستخف بسنك ويشوفك بزرة..خاصةً إنه صك الثلاثين!!!
اسمهان:والله محد مستخف فيني إلا انتي!!
وبعدين اش اللي عمره 30 سنة؟ يعني كبر أخوي محمد؟!وكبر زوجك ياأسماء؟؟
الأم:ايه كبر محمد واشفيها ؟هذا محمد ماشاء الله عليه تزوج قبله من 4سنين!وأحمد زوج أسماء نفس الشي.
اسمهان:أنا توقعت بتقولون عمره22 او 23 سنة بس!
اسماء:الحمدلله والشكر!أي 22 و23 سنة زواج بزارين هذا!
اسمهان:طبيعي أستغرب ياست اسماء الفرق بينك وبين أحمد زوجك5 سنين بس!لكن أنا وذا العريس بيننا 13 سنة!!!لو مزوجينه أهله بالمتوسط كان خَلَّف بنت بعمري!!!
الأم:يااسمهان يابنتي الرجال مايوصل الثلاثين الا ونضج عقله..وصار قادر يتحمل المسئولية..أحسن من شباب العشرينات اللي باقي مخفة!!!!
........واستمر الحوار والنقار لين ماطلع عليهم النهارسمعت ياشهريار؟! أمزح!!هههه
المهم ثاني يوم بدأت الاستعدادات بإعداد المأكولات وضيافة القهوة والشاي وكانت الزيارة الأولى بحضور الأم بس!كنوع من التعارف عن قرب بالعروسة وأهلها...
وطبعا اسمهان ماحطت يدها بشي قاعدة من صباح الله خير تسوي ماسكات لوجهها وخلطات لشعرها وتضبط أظافيرها وحالتها حالة!!!
وكانت اسماء جاية من بدري تساعد أمها في المطبخ!
ولما شافت أختها تتمخطر طول النهار بخلطات ووصفات صاحت فيها:اسمهــــــــــــــــــــــــــان!
وش له تتزينين؟! الحرمة وحافظة شكلك أكيد من يوم ماشافتك تطامرين من أول زواج بنت خالك لآخره!!يعني عاجبتها!
ولو اني متأكدة إنها لو شافتك وانتي لابسة روب قديم وحاطة حنة بشعرك والحنة تقوطر فوق خدودك واذانيك كان بيكون لها رأي ثاني!!!!!
اسمهان:وش حار كبدك ياخالتي قماشة؟!!
أنا أحب التزين والتكشخ..طبعي كذا!!
اسماء:لايجي المغرب الا وانتي جاهزة..الحرمة بتجي بعد المغرب مباشرة!
وراحت اسمهان تتروش ولما خلصت احتاست بشعرها اللي كان مرة طويل وش تسوي فيه!
وقالت:ياأسماء وش رايك أدهن شعري كله جِل وأسويه نقرو مو أحلى؟!!
اسماء:لا ياشيخة؟الحرمة هذي جايه تتمقل فيك زين عشان تسوي بث حصري لولدها وأهلها بمواصفاتك..وانتي تبغين تفشلينا بالعشة اللي بتنصبينها على راسك؟!!!!!
اسمهان:والله مافيني اسشوره..شعري طويــــــــل وغزيـــــــر ويديني مرهقة!!تسشورين لي؟!
اسماء: ولا يطراني...أنا عجزانة أرفع ولدي أرضعه! وتبيني اسشور لك؟!!
اسمهان:إذن بأكلم نوف بنت عمي تجي تسشور لي سشوارها يهبل!
اسماء:إصحِك(إصحك بالمصري يعني إوعي!!!)المفروض الأمور هذي تسير في الكتمان...مو تروحين تنشرين الخبروالله يعلم يكون في نصيب او لا!
.....
********
طبعا بعد ماالآنسة اسمهان ذات الشعرالكستنائي الطويل(حشا صارت روبينزل هذي!!هههه)كانت متعيجزة تفرد شعرها بالسشوار...أسرعت لتستنجد بحمَّالة الأسية(كاتيا)شغالتهم!!!
وقالت:كاتيا بلييز..اتركي مافــــــ ـيدك وضبطي لي ماي هير!!
كاتيا:واي مس اسمهان؟!ار يو قوتو ذا اوت سايد؟!!!!
اسمهان:لا وانتي الصادقة اللي ساكنين اوت سايد جايين عندنا!!!
وانطلقت اسمهان مع كاتيا اللي سشورت شعرها وقعدت تمنكر لها أظافرها...
ودخلت أم اسمهان وشافتها على هالحال وقالت:
يابنتي وشفيك ترى العرس مو اليوم!!!
وجت من وراها اسماء بعصبيتها المعتادة وقالت:
خليها في خيبتها يمة..مسكينة أول مرة تنخطب!!
اسمهان:بسم الله علينا وأنا اش سويت؟!
حرام أتهندم؟! ولا انتوا ودكم بوحدة تفشلكم تطلع قدام الناس بشوشتها؟!!
الأم:لا..لا..بس لاتبالغين بزينتك خلك على طبيعتك أفضل..
اسماء:وعجلي.. بقي دقايق على صلاة المغرب .
****وخرجوا من الغرفة..لكن اسمهان راحت تركض وراهم وقالت:تعالوا تعالوا مااخترتوا لي اش ألبس؟!
أسماء: وش رايك يايمة؟أنا أقول تلبس بيجامة!
الأم:لا مريول المدرسة أكشخ!!
اسمهان بسخرية:لا بأِلف منشفة حول خصري وأطلع!!!
الأم:يابنتي ياشين اسئلتك!البسي أي شي اعتبري نفسك طالعة من البيت والبسي من ملابس الطلعات اللي عندك ..ماشاء الله دولابك متروس!
اسمهان:أدري بس محتارة اش ألبس!
اسماء:يختي عليك!!مو لو تقتصدين في الملابس مااحترتي! لكن بلاك كل مانزلتي السوق قشيتي الشين والزين..عندك همول تفتح لك محل!
وراحت اسمهان طلعت بنطلون جنزوبلوزة قطن وقالت:هاه..وش رايكم؟[ندعوك للتسجيل في المنتدى أو التعريف بنفسك لمعاينة هذه الصورة]
الأم:بالله من جدك؟يايمة شكلك بعدك مو مستوعبة انه بيجينا زوار..مو طالعين للبحر!!
وقامت اسمهان وطلعت فستان ماركة حلو بس مكشف من فوق و قصيــــــــــــــــرمن تحت!وقالت:طيب هذا؟!

اسماء:لاعز الله بنـتـفشل!!استحي بتخرجين كراعينك قدام أم المعرس؟!!لا وسيقانك مو منتوفة!!
الأم:أحذرك يااسمهان تلبسين قدام الحرمة كذا..
احنا ماندري عن طبعهم كيف..الحين تاخذ فكرة إننا مو محافظين ونحب التعري...وانتي أصلا مو مقصرة كل عرس وانتي مفشلتنا بفساتينك شي شفاف وشي كاسي عاري..الله يصلحك.
اسماء:طبعاً...! اخرة الدلع...قلة الاحترام!
اسمهان:خلاااااااااااااص تراني انغثيت!!اش ودكم ألبس فستان حمل ولاعبايتي؟!! هذا الدولاب قدامكم اختاروا وريحوني..
الأم قامت تفتش في الدولاب عن تنورة طويلة لين لقيت أخيراً وبعد جهدٍ جهيد تنورة ماشي حالها بس ماهي ذاك الطول ..
وقالت:اش هذا يااسمهان دولابك يبي له اعادة نظر..مافي شي ساتر؟!
الله يعين عليك!!خلاص البسي هالتنورة وشوفي لها بلوزة
[ندعوك للتسجيل في المنتدى أو التعريف بنفسك لمعاينة هذه الصورة].
اسمهان:بس يمة ماهي حلوة علي!!
اسماء: أجل ليش رازتها بدولابك؟!
أمهم:تستاهلين ...قاعدة ساعة أحوس بدولابك وفي النهاية مالقيت إلا فساتين قصيرة وبلايز مشخلعة وبناطيل ضيقة!!!
أبي أفهم قد مانروح أسواق ماقدرتي تشترين لنفسك ملابس حشمة وأنيقة؟؟؟؟؟؟؟؟
اسماء:أنا أدري عنها يمة؟؟
كاتيا الكافرة هذي ملابسها أحشم بمية مرة من بنتك!!!
كاتيا:وت إز إت مين (كافرة) مدام أسماء؟!!!
اسماء(طاح وجهها وقالت وش هالنشبة؟!!!هههه):
إت إز مين فيري بيوتيفل!!(يعني مرة حلوة!!)
كاتيا:أوووه ثانك يو مدام!!!! :D
نتبع

مره روعة والله صار عبد الرحمن رمانسي باقة ورد لا تطولي علينا وخلي العروسه تقوم قبل ما انام ههههههههههههههههههههه تقبلي مروري يا التوامان كول

s.a كتب:: مره روعة والله صار عبد الرحمن رمانسي باقة ورد لا تطولي علينا وخلي العروسه تقوم قبل ما انام ههههههههههههههههههههه تقبلي مروري يا التوامان كول

مشكورة يا حبي
وان شاء الله ما اطول عليكـ

مشكوووووره ياقمممر...
انتظظظر التكمللله بفااارغ صبري..

وآآو روووووعه والله

تسلمووون

ننتظر البــآرت القـآدم ^___^

(البارت 6)
^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^
المهم أختنا في الله اسمهان دخلت وتشطفت وحطت راسها على المخدة ونــــــــــامت موب ساعتين مثل ماقالت أمها!! لااااااااااا نومها ثقــــــــــــــــــيل جدا!!
لو انهدت فوقها طوفة ماصحت!!

قامت تشخر بعالي الصوت طلعت أمها تصحيها العصر ماصحت...أرسلت كاتيا الشغاله تصحيها هم بعد ماصحت
ووصلوا الضيوف كلهم(أخوها وأخواتها) وهي ماصحت!
راحت ابتسام جمعت كل البزارين
وقالت:هجووووووم على خالتكم لاتنزلون إلا وهي معكم!!
وبالفعل طلعوا بزورة محمد(سعيد ووليد)وناقزوا فوق سريرها!!وهي نايمة تشخر
وولد ابتسام يحوس بالغرفة..(وهيفاء وسارة)بنات ابتسام يلعبون على التسريحة! واسمهان طاقة النومة!!!
راحوا هيفاء وسارة وأخذوا اصبع روج ورسموا بوجه خالتهم اسمهان وهي موب دارية عن الدنيا تهشهم مثل هش الذبان!! وهم مسويين حفلة تنكرية بوجهها!!

وفككوا البكلات من شعرها وسعيد ماقصر كب بودرة على شعرها!! لما زهقوا البزران ان خالتهم ماتصحى كمل وليد الناقص وحذفها بقزازة عطر على جبهتها خلتها تنقز نقزة وتزأر زئير فاخترعوا البزران ونزلوا بالصالة عند أمهاتهم!!!
واسمهان وراهم تهدد وتتوعد!!وهي نازلة من الدرج قامت ابتسام
ترحب:ياهلا بعروستنا وياغلا!
وأسماء وسماح زوجة أخوهم يبحلقون في منظر اسمهان باستغراب شديد الشوشة منفووووشة وعليها كيلو بودرة!! ووجهها من أوله لآخره مشخبط بروج لونه أحمر!!وجبهتها وارمة من أثر قزازة العطر!!!!!
قالت أسماء:أي عروس ياابتسام؟سألتك بالله هذا منظر عروس؟ هذه مومياء خارجة من تابوت!!!!
وسماح تقهقه وتقول: ياحليل العيال راسمين بوجهك خرايط!!ناقصك وشاح على راسك ونكتب عليه(مصاصة الدماء!!!)...
أسماء:تكفين تكفين ضفي وجهك عني أنا حامل وماأبي أتوحم على هالشيفة!!
اسمهان:لابارك الله فيكم ولافي عيالكم المجانين..قوموا نظفوا غرفتي اللي تقولون ضاربها إعصار!!
....إلا بهاللحظة دخل الأب وقال:
الله يحي هالوجوه الطيبة..وأحب أقول لكم إني طول هالأسبوع وأنا أسأل عن ولد الناس ..وماسمعت عنه إلا كل خير..وبكرة
بإذن الله بأناديه أتعرف عليه! وش قلتي ياأم محمد؟!!الأم: أبركها من ساعة...
سماح: ولو تخلون اليوم اللي بعده الشوفة يكون أحلى!!اسمهان: وشهو؟؟ على كيفكم والله!! يبي يجي بكرة بكيفه أما شوفة.. انسوا الموضوع!! انتي بالذات ياسماحوه مالك وجه تتكلمين! بعد ماولدك فقشني براسي تبين تكملين الناقص وتخلين شوفتي بعد بكرة؟!!!
قام أبوها انتبه ذيك الساعة لشكلها وفز ثم قال:يالله تسكنهم مساكنهم!! ياحليلك !عفستي وجهك هاللون عشان تضحكين البزران؟!!

اسمهان:إلا هم اللي ضحكوا علي ولعبوا في حسبتي!!!
الأب:عموما...مثل ماقلت لكم بأكلمه يجي بكرة نتعرف عليه أنا ومحمد وأزواج البنات..وبعدين نحدد يوم الشوفة.....
الأم:على خير...
وقرصت الأم اسمهان من أذنها وقالت:بالله استحي وروحي سنعي نفسك..هذا وجه تقابلين فيه خواتك وزوجة أخوك؟!!
وطلعت اسمهان تتهندم ويوم شافت شكلها بالمراية اخترعت!!!!!!!!وبعد كم ساعة الورم اللي بجبهتها زاد!!
ومرت السهرة على خير....
وكان مما دار فيها:ابتسام:أخيرا تقابلنا!! مابغينا!
أسماء: إحنا دوم مجتمعين انتي الوحيدة اللي ساكنة بديرة ثانية..وفوق ذا كله زياراتك قليلة..
ابتسام: وهي عجوز النار..تخلي أحد يتنفس؟!!
تتنقل من بيتنا لبيت ولدها الثاني ولبيوت بناتها ثم ترجع لنا وياويل تسمع إنا سافرنا تجينا بعد مانرجع وتلبد مدة وقدرها!!!
أسماء: الحمدلله أم زوجي متوفية وإلا كان شاب راسي منها!!!
الأم:والله ربي رحمها ماتشوفك!! ولا انتي تشيبين راس قبيلة ولاشبتي!!
سماح:والله لو ألف الكون كله ماألقى أحسن من خالتي! الله يحفظك لنا ياأم محمد...
ابتسام:معلوم الطيب يسحر الناس بطيبه..وأمي ماتغلط على أحد حتى يغلط عليها...بس بلاكم ماشفتوا أم أربع وأربعين كيف تحرش أولادها على نسوانهم وتفاتن بينهم!!بس عزاي إن زوجي يسمع من إذن ويطلع من الثانية!!!!!!
الأم: يابنتي عيب عليك تتكلمين عن مره كبيره بهالشكل ولو سوت معك ماسوت!!
اسماء: خلها تفك عن صدرها شوي يايمة! لاتكونين انتي والزمن عليها!
ابتسام:إيه صدقتي..أحس اني مخنوقة..عجوزنا هذي كم بغوا عيالها فيها يشرون لها بيت أو شقة تسكن فيها وحنا اللي نزورها بدل ماهي تتنقل كل يوم..بس حالفة يمين ماتحقق مرادهم...عاجبتها حياة التنقل كأنها من البدو الرحل!!!!!
الأم:يابنتي الله لايبلاك وتسيرين بيوم من الأيام مثلها يمكن مسيكينة تخاف لاسكنت ببيت بروحها محد يتذكرها ويزورها وكلن بينشغل عنها!!
اسمهان: الحمدلله أنا أم زوجي ساكنة معي بنفس العمارة هي بدور وأنا بدور..يعني ماتحتاج تقعد عندي بالأسابيع والشهور!!
اسماء:طالعوا هذي وشتقول!! صار اسمه زوجك خلاص؟ربطتيه يالعقرب وبعده ماشافك؟!!
سماح قامت تضحك هي وابتسام....
واسمهان تقول:اطلعي منها وهي تعمر!!!&&&&&&&&&&&&&&&&&&&&&&&&&&&&&&&&&&&&&&&&&&&&&&&&
ومرت سهرة الأربعاء....وجاء يوم الخميس وجاء العريس..اللي مافات اسمهان انها تطلع تشوفه من الشباك العلوي شافت هيئته العامة لكن ملامح وجهه مابينت معها!!
وكانوا أمها وخواتها وسماح زوجة أخوها مجتمعين.....ينتظرون على أحر من الجمر انطباع الرجال عنه!

ودخل محمد ياخذ القهوة فاجتمعوا كلهم عليه يسألونه..وقال:والله ماشاء الله عليه وسيم وخلوق وباين إنه مثقف..
اسماء(قالت بقصد تستفز اسمهان!):
خسارة هالصفات الزينة بهالمرجوجة اسمهان!اسمهان:يالطيف على الحسد!
ابتسام:ماعليك منها ودها تغيظك..الله يتمم لك حبيبتي على خير..طيبة وتستاهلين!!
اسماء:أي طيبة؟؟ماشفتيها لاكشرت عن أنيابها!
سماح:والله سمهونة قد ماتسوي حركتات بس قلبها أبيض بالحيل..
الأم:أنا عندي احساس بأن هالموضوع بيتم بإذن الله وإن عبدالرحمن بيطلع ولد حلال..

اسمهان:الله لايخيب ظنك يايمة!!
أسماء:أذبحك ياهالبنت؟؟؟وش عليه مستعجلة ياحظي؟؟..تحسبين الزواج سعادة وأنس؟؟إلا بالعكس هم ماينلم!!اسأليني عن الرجال بس!
الأم:الله وأكبر عليك يامكفرة العشير...هذا وزوجك من أحسن الرجال!
سماح:ماعرفتي له..ولا كان ضبطت أمورك ياأسماء!!
اسماء:اسكتي واللي يرحم والديك!عاد اللي يسمعك يقول انتي عرفتي لمحمد!!خذيتيه طيب جاهز وتحسبين لك دور بنجاح حياتك الزوجية!!!!!
الأم:انتي مايعيبك الا لسانك!! ولا كان توفقتي بكل شي وجتك الدنيا على هواك!
ابتسام:صادقة أمي..الله قال(ولئن شكرتم لأزيدنكم) لو شاكرة ربك كان حسيتي بالرضا دايم بدل هالتذمر!!
اسماء:عشتوا!!نسيتي نفسك يامدام شكاوي؟؟ورا ماشكرتي انتي ربك؟؟؟
اسمهان(وهي رافعة يدها للسماء):يالله تعجل بفرجي وتفكني من هالغثا!!!
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
طبعاً عبدالرحمن كان جالس بالمجلس مع أبو اسمهان وأخوها محمد وأزواج أخواتها ابتسام واسماء...وكلمهم عن نفسه..ووظيفته وإنه موظف بشركة للمواد البترولية..دخله ممتاز..وساكن بدور مستقل في بيت أبوه..
لكن أبو اسمهان فاجأه بسؤال:طيب ياولدي مادام ربي فاتحها عليك وأوضاعك ممتازة اش اللي خلاك تتأخر بزواجك للحين؟!!!!
عبدالرحمن:الحقيقة كنت ناوي ماأتزوج إلا لما أبني نفسي من غير اعتماد كلي على الوالد...وقبل 3 سنوات نويت الزواج فعلا لكن الوالد تعب فجأة
واكتشفنا إنه عنده جلطة واضطريت أرافقه باستمرار في رحلته العلاجية وفي كل مستشفى ومر وقت لين مادخل بغيبوبة..ساعتها حسيت إنه كل مسئولية عائلتي بيدي ففضلت إني أؤجل موضوع الزواج شوي..وبعدها توفى الوالد
وبقيت بجنب أمي بصفتي الولد الكبير..لأن أخواني الاثنين كل واحد متوظف بديرة مختلفة وبعيدين عنا
وأمي مالها أحد غيري..فشفت إن راحتها بوجودي جنبها..بس حاليا نقل واحد من اخواني هنا..وقالت الوالدة جاء الوقت اللي تشوف نفسك فيه...والحمدلله ربي هداني
أخطب عند ناس طيبين شرواكم...
أبواسمهان:بارك الله فيك....
ودخلوا الرجال بعدها بسواليف كثيرة..وأهم شي إنهم حددوا موعد الشوفة!!!
وبعد ماراح عبدالرحمن بيته دخل أبوها وأخوها عند الحريم...
إلا أم اسمهان قالت:هاه..بشروا واش انطباعاتكم؟؟
أبواسمهان:الحق ينقال..الرجال عقل وثقل..ومابنلقى أحسن منه...
أم اسمهان:الحمدلله...يعني واش اتفقتوا عليه؟؟
الأب:حددنا الشوفة الأسبوع الجاي يوم الخميس!اسمهان:ليـــــــــــــــــــــــــــش؟؟؟؟ الفقشة اللي بجبهتي مابتروح شلون أطلع قدامه كذا؟!!!!اسماء:يختي على الكشخة!! في اختراع اسمه لصق جروح!أو نزلي قصتك على جبهتك وريحي نفسك!!
ابتسام:وياترى ياأبوي كيف شكل المعرس؟؟
الأب: ماشاء الله وسيم ورزة...لكنه طويـــــــــــــل!
اسمهان:أطول مني؟؟؟؟؟؟؟
الأب: بكثيــــــــــر!!!!اسمهان:أفففففففففففف!
...............وراحوا الرجال يكملون قعدتهم مع ازواج البنات..
وقالت اسمهان:شوفي يمة دامكم حددتوا شوفتي الخميس الجاي فأنا عندي شروط!!
اسماء: بدينا؟؟؟خير ان شاء الله تبينه يبني لك فيلا عالبحر؟؟؟؟؟؟
اسمهان:لا!! بس الشوفة مو بتكون الخميس؟؟
إذن الأربعاء لازم أروح السوق!!!
الأم:ليه؟؟
اسمهان:ودي أشتري لبس أكشخ فيه!
اسماء:الله يقطع ابليسك! دولابك يصيح من الزحمة اللي فيه...وباقي لك نفس تحشينه بخروق ثانية؟؟؟
وش هالفقعة؟؟؟؟؟
الأم:في هذي معاها حق!! نسيتي يوم فتشنا بدولابها يوم جت أم المعرس مالقينا شي يستر ويحشم..ودك يعني تفشلنا قدام ولد الناس؟؟؟
خلاص يااسمهان ولايهمك ننزل السوق يوم الأربعاء الجاي..
اسمهان:وبعد عندي شرط!
ابتسام:بعد؟؟؟؟
اسمهان:إيه ..مادام إن العريس طويل بالحيل ..فالصراحة فشلة إني أطلع قدامه بكعب قصيرأبي أشري
صندل كعبه طويـــــــل!!!
اسماء:وأحد قال لك بنزفه جنبك؟؟؟ حبيبتي ترى هذي شوفة كلها دقيقتين تدخلين قدامه يبقق عيونه فيك وتعطينه مقفاك وتمشين!!!!!
اسمهان:ولو! أحب أكون مميزة بكل شي!! وأفكر بعد اللبس اللي أشريه يكون لونه أحمر!!!!
أسماء: ليه ياحلوة؟؟بتتزوجين ثور؟؟؟
اسمهان:أجل أسود!
اسماء: ليه رايحة عزاء؟؟؟؟
سماح:الصراحة أنا أقترح عليك يااسمهان تلبسين لون بنَّاتي ناعم..وردي مثلاً!
اسماء:صادقة سماح,,ولو تفرقين شعرك بالنص وتلبسين شباصتين وتاخذين معك حلوة مصاص تطلعين كشخة!!!
اسمهان:استغفر الله!! تراني تخرجت من
الروضة من زمــــــــان!
ابتسام:طيب اش رايك بالتركواز؟؟
اسمهان:وعععع...بيسمرني مرة!
الأم:اقتراحاتكم كلها فاشلة! ومابأستفيد منها غير وجع القلب!اسمهان ماقد نزلت معها سوق إلا وأحلف ماعد أعيدها!!!!وبعدين أول مرة أشوف أحد يختار
اللون وهو باقي ماشاف الموديلات! اللي يسمعكم
يقول بنروح نفصل!!إحنا رايحين ندور على اللبس المناسب وعقبه نطالع للون!!
سماح:كلام أم محمد صح...ومو ضروري اللبس كله لون واحد..البلوزة لون والتنورة لون ثاني..........
طبعاً بعد ما يوم الخميس انقضى جاء عقبه الجمعة...مامن جديد إلا إنه الآنسة اسمهان شاغلتها الفقشة اللي براسها وهي متوصية شوي تحط عليها ثلج ..وشوي كمادة حارة!
جاء يوم السبت وراحت اسمهان كعادتها للمدرسة واستقبلتها شلة الأنس..
مرام:سلامــــــــات وشفيها جبهتك وارمة؟؟ جاك طقة؟؟
أفنان:يمكن أهلها رفضوا المعرس وراحت تطق براسها ودها تنتحر وصار اللي صار!!
نجلاء:إلا يمكن وهي ماشية بالشارع كانت تفكر في عبدالرحمن لين ماخبطت بعمود!! حليله
العمود رحمته!!اسمهان:موب صاحيين!! هذي يالحبايب طريقة عيال خواتي وأخوي في التعبير عن مشاعرهم تجاهي!!!وحكت لهم القصة...وقالت: شوروا علي بوصفة تخفف من شكلها شوي..
رانية:أحيانا يكون الدواء بنفس طريقة حدوث الداء!!!
اسمهان: وشلون يعني مافهمت!
رانية:يعني اخبطي براسك بقوة في جدار والورم اللي طالع لبرة بيرد يدخل لجوة!!!!
اسمهان:ماشاء الله على الحل! متأثرة بحركات توم وجيري!!تراني أكلمكم بجد..شوفتي الخميس الجاي!نجلاء:بسيطة ..طلعيني بدالك قدام المعرس!!
اسمهان: يامابك!!
رانية:وش بتلبسين؟؟
اسمهان:لسة مو عارفة..
رانية:لاأوصيك!
خلك كشخة على الآخر..لو حصل نصيب بيظل يتذكر كشختك طول عمره!...وإن ماحصل نصيب بيبقى يتذكركشختك ويقول حصل لي كذا وكذا أيام بنت فلان الكشخة!!!
اسمهان:يوم الأربعاء بأنزل السوق وأجرب حظي..
نجلاء:خلك اتكيت وناظريه بثقة....لاتسوين نفسك مستحية بعدين يقول هالهبلة ميتة علي!!!
أفنان:وإذا سألك أي سؤال جاوبيه إجابات مبهمة وغير مفهومة..عشان يقول هالبنت مثقفة!!مرام:وأكيد يوم الشوفة بيجيب معاه هدية طقم أو إسورة أو أي شي ذهب..لاأعطاكي إياها خذيها منه وارمي بها على أقرب كنبة بقلة اهتمام! عشان يعرف إنك بنت عز ومو ميتة على الهدايا!!!!!
نجلاء: وانتبهي لاتسوين مثل أختي ندى أصرت تدخل على خاطبها وهي شايلة بيدها شي..وأخذت عصير ومن الارتباك كبته فوق ولد الناس!!والأدهى إنه ماحصل بينهم نصيب!!!...يمديه إلى الآن يذكر هالموقف!!!
أفنان:واحمدي ربك عندك أهل يرضون بمبدأ الشوفة ويعطونك خبر تتسنعين!! حنا بعيلتنا يخلون الشوفة تصير على غفلة والعروس موب دارية...وذوقي من الفشايل!! اللي شافها عريسها وهي تناقز بالحوش
تقولون فيها مس!! واللي شافها خطيبها وهي ببيجامة
مهرية ومبلحة من كثر الغسيل وبنطلون البيجامة موب طقم مع
البلوزة!!!واللي كانت تصلي العشا بشرشف صلاتها وخلوا العريس يشوفها من عند الباب!!
اسمهان:ياحليلهم..وبالذات هذي اللي قاعدة تصلي ..واش شاف منها وهي لابسة شرشف صالة ماينشاف منه شي؟!!!!!
أفنان: لا هو الصراحة ماشافها زين...لكن أعجبته صلاتها وتزوجها!!!
[color=violet]رانية:وإش هالتخلف بعيلتكم ياأفنانوه؟؟؟ الرسول حث الصحابة على الشوفة الشرعية..والمفروض تكون برضا بين الطرفين..مثل ماهو له نفس يشوفها هي بعد لها نفس تشوفه!!!!!وبعدها يسير الارتياح!arkblue]]أفنان:مو الله يسلمك باعتقادهم انهم لاعطونا خبر بنتزين ونطلع بشكل مخالف للواقع!!
........إلا دق الجرس وبدأت الطوابير***
****************نتبع...*************

يلا ابغا ردودكم عشان اكمل البارت 7

مـــــشــــــكــــــــوره يـــــاقــمــمــمـــر ^_^ ..
انــتـظــر الـتـــــكــــمـــــلـــــــه بــــــــفــــــآآآرغــــــ آلـــصــبــــر ..

يسلموووووو حبيبتي على البارت الجديد

بانتظار التكمله

دمتي متألقه ،،،

مشكورين حبايبي ع ردودكم الحلوه الله لايحرمنا منها
الــــــــــــبارتـ7ــــ
*******************************************
ومر اليوم الدراسي....ولما جاء وقت الفسحة خرجوا الشلة من فصلهم يتفسحون.....وماشيين يناظرون بالرايح والجاي وكان في وحدة من الطالبات بينها وبين الشلة عداوات قديمة فحصل هذا الحوار:
رانية:يوووووووه...شفتوا عبير هالكريهة ياناس ماأدانيها..طالعوا التسريحة بس! يارب لك الحمد على نعمة العقل!
اسمهان:كريهة وبس؟! أتعب أقول إن هالبنت غثيثة وماتنطاق.....غـــــــرور فظيـــــــع على وشهو ياحسرة مانيب دارية!!!
نجلاء:تحسب إن فلوس أبوها التاجر بتحبب الناس فيها! بعد مافحطت يمين ويسار عشان تسوي صداقات يالله لقت لها اثنين يتنازلون يتصاحبون معها!!
أفنان:يانا طاقتن كبدي منها ومن تسريحتها تقولون هضبة نجد وحولها عرفج؟!!!!
مرام:بالله تجنبوها..كل مرة نتهاوش فيها توصل هواشتنا الادارة...ومحد يفك لسانه علينا إلا أبلة جوهرة!!!
اسمهان:صادقة مرام ياجماعة...لاتنسون أنا وضعي حرِج الآن وماأبي أحتك بأبلة جوهرة!!
رانية:تكفين يالكشخة!! خايفة المعرس يروح من يدينك؟؟ مالت عليه وعلى خالته!إش رايك إن العفاريت تلعب براسي وودي أنكد على هالعبير؟؟؟!!
اسمهان:وجع! صدق إنك حقود مادام ماغلطت علينا..ليش حنا نغلط؟؟
رانية:انظروا ياجماعة الخير..الآنسة اسمهان قامت ترفرف في عالم المثاليات!! شوفي حبيبتي صح ماسوت لي شي اليوم بس ماأنساها لها الأسبوع اللي فات يوم إني ماشية بالساحة لقيتها ماشية وراي وتقلد مشيتي على الصامت والبنات يضحكون!!ويوم انتبهت قامت تقط علي حكي....
اسمهان:قلعتك...إحنا بنقعد في الكافتيريا نفطر..
عاد رانية راعية شَكَل تحب المهاوش والأكشن وقامت تدور حول عبير وصاحباتها...إلا عبير طالعت فيها باستحقار وقالت:خير؟؟ طردوك شلتك؟؟
رانية:لا تطمني! هذا المستحيل بعينه! بس أنا قلت بمناسبة فوز فريق(..؟..) اللي أشجعه حبيت أعزمكم وكل المشاريب هذي على حسابي..وقدمت لعبير وصاحباتها الثنتين 3 علب بيبسي مخضوضة خض موب صاحي...وأخذوها حطوها قدامهم...بس رانية أصرت على عبير تشرب وقالت:عبير الكل عارف الحزازيات اللي بيني وبينك...وأنا ودي نتصالح..وننسى كل مامضى!عبير:أنا ماعندي مشكلة...بس انتي اللي تحبين تبدين بالمشاكل دايما.
رانية:زين طلبتك عشان أعرف إنك راضية علي اشربي البيبسي!
فكت عبير البيبسي بحماس وطرطش على شعرها ووجهها...
وراحت رانية المستهترة تضحك وتقول:ماعليه حبيبتي تعيشين وتاكلين غيرها..وعلى فكرة أول الغيث قطرة! لو غلطتي علي بنظرة..بأحوسك حوس!!
ورجعت رانية لشلتها..
.مرام:الله لايسامحك شوفي شلون عدمتي شعرها دبق!!
رانية:أحسن خلي تسريحتها الرائعة تنحاس!!ههههه
نجلاء:ياتفاهتك! كان خليتي هالطاقة على شي يستاهل!
ومامر لحظات إلا والادارة ينادون شلة الصاعقة!
اسمهان:يلا..استلموا..هذا وأنا موصيتك ياست رانية !!لابد من الفشايل لابد!!
وتوجهوا الشلة للإدارة...
ومسكتهم أبلة جوهرة وقالت:للمرة الألف أقول لكم ماأبي أشوف رقعة وجيهكم بالإدارة!! وش جابكم علموني؟؟
رانية:مدري انتم استدعيتونا!
جوهرة:العبي غيرها..استحوا على وجيهكم قدر ايش اعماركم ومازلتوا تلعبون بالأكل والشرب وتقطونه على صاحباتكم؟؟؟
اسمهان وهي ترتجف من الخوف:أبلة جوهرة...تراني ماكنت معاهم!!!!!! وماشفت شي!
التفتوا كل الشلة لها باستغراب....
أبلة جوهرة:كان قلبي حاس..إن وحدة بأخلاقك ماتتنزل لهالمستوى السخيف!!
ارجعي فصلك يااسمهان!!! وانتم كلكم بتكتبون تعهد وتعتذرون لصاحبتكم اللي عدمتوا شعرها وملابسها!!!
رانية:تخسي إلا هي!!!
أبلة جوهرة:وبعد تطولين لسانك؟!!
وبعد شد وجذب تنازلوا يعتذرون لعبير..
ورجعوا لفصلهم وهم يلومون رانية...
أفنان:شوفي سخافتك وين ودتنا!آخر شي كنت أتوقعه إني أعتذر عن شي ماسويته!! ولمين لعبير؟؟؟مرام:وكل بلوة تسوينها يارانية لازم تجرينا كلنا معك! ترى لسة حارقتني بقلبي الحركة اللي سويتيها قبل مدة وتعاقبنا كلنا بسببك!
رانية:أي حركة؟؟
نجلاء:يحق لك ماتتذكرين! من كثر ماتسوين يالعاقلة!!أكيد يامرام تقصدين يوم كذبت على أم سالم الفراشة وسحبت منها المبخرة يوم جية الموجهات وقالت هاتي المبخرة ياأم سالم أبلة حصة تبيها وخذتها وحطتها تحت جهاز إنذار الحرايق..وأطلق الجهاز إنذار كاذب وصفرت الصفارة وكل المدرسة خرجوا يركضون في الساحة...يومها سويتي لنا رعب وكتبنا كلنا تعهد بسببك...لو هلي دروا كان ذبحوني!!!أفنان:لا وكله كوم ويوم جابت طراطيع وطرطعتها داخل الفصل واحترق الموكيت!!
وفجأة التفتوا لاسمهان اللي كاتمة الضحكة
وقالت أفنان:ماتلاحظون الواسطات شغالة هاليومين؟!!
نجلاء:إلا ملاحظين وبقوة...وحطي معاها الكذب بعد..قال إيش(وتقلد اسمهان!) أنا ماكنت معاهم وماشفت شي!!

رانية:هذا اتفاقنا يارئيسة الشلة؟؟؟ اللي يجري علي يجري عليكم؟؟؟
اسمهان:دا كان زمان ياحبايبي!! من اليوم ورايح أنا حرة نفسي ومو مسئولة عن أحد!
رانية: عجيب أمرك!! بتبيعينا عشان بريستجك قدام جوهرة؟؟؟زين يالكشخة اسمعي هذي مني!! ترى الورد اللي كنتي فرحانة فيه من مخططاتي ومحد افتكرك وجوهرة هزأتنا يوم درت إنه مقلب وقالت لاتعلمون اسمهان!!!
اسمهان(وهي متفاجئة):شلون؟؟
صاروا الشلة يغمزون لرانية يبونها تسكت لكن أبد قاعدة تحكي بالتفصيل!!!&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
طبعاً بعد ما الأخت رانية قالت لاسمهان عن مقلب الورد وكانت لهجتها جافة......
اسمهان انصدمت وزعلت جداً لأن موقفها صار بايخ جداً قدام جوهرة..والشلة اللي لعبوا بمشاعرها...ودمعت دمعتين..وقالت نجلاء:اسمهان ترى مانقصد..
لكن اسمهان أشرت بيدها لنجلاء بعدم رغبتها بالكلام وشوي ودخلت معلمة التاريخ وبدأت الحصة..
وطول الحصة واسمهان متضايقة وتفكر بنفسها:ليش هالنذالة من شلتي؟؟؟ يعني أنا اللي جمعتهم وضميتهم لي من أيام المتوسط وتاليتها ينقلب السحر على الساحر؟؟؟؟؟؟؟
بعد ماكنا نسوي مقالب بالبنات..رجعوا هم يسوون مقالبهم فيني؟؟ هين!! أوريكم أنا الزعل على أصوله!
بس ياربي أنا تعودت عليهم وماأمشي مع أحد غيرهم..أروح لمين؟؟؟؟
.....ومرت حصة ورا الثانية وبنهاية الدوام حاول الكل يكلمها ورفضت ورجعت للبيت..
ومر يوم السبت.واتصلوا صاحباتها لكن بكل مرة كانت اسمهان تطلب من ابتسام تصرفهم!!!
وثاني يوم اللي هو الأحد راحت اسمهان من بدري للمدرسة وتوجهت إلى عبير غريمة الشلة!!!
وقامت تتودد لها وكل همها تكيد الشلة!! ولا مو من حبها في عبير!!
بس عبير قالت:خير ان شاء الله مقلب جديد من شلة حسب الله؟؟؟!!!
اسمهان: لاتفهميني غلط..أنا مالي ذنب باللي حصل أمس!! شفتيني معاهم؟؟ لاوقعت تعهد ولااعتذرت لك أمس لأنه مالي علاقة بالموضوع......لا وأبشرك تركتهم بعد مشكلة أمس..حسيت إنهم سخيفات وحركاتهم صبيانية!!!!
عبير: هذا من زمان رأيي فيهم!
اسمهان: ترى قمة قهرهم يشوفوني معك!! عشان كذا بالطقاق عليهم مايهموني أبد!! ودي أكون معك ومع صاحباتك نادية وهالة...انتم أهدى وأذوق!!!!
عبير:ولو اكتشفت إنك تلعبين علي....؟؟؟؟؟
اسمهان:أي لعب وأي خرابيط؟أنا عصاك اللي ماتعصاك!!!(والحقيقة ان اسمهان قاعدة تقول بقلبها الله ياخذك ياعبيروه! كريهة عن قرب وعن بعد!!!!)
ومشت معاها بالصبح ووقفت معاها بالطابور ونقلت جنبها بالصف.....ونظرات الشلة ماتفارقها!!
في الحصة الأولى...جلسوا الشلة يتهامسون
رانية: هالحين خلصوا البنات يوم تفارقنا وتروح لعبير؟؟؟؟؟؟
نجلاء: يمكن كلام عبير عندها أحسن من كلامك اللي ينقط سم!!!
أفنان:ويمكن عبير شافتنا يوم تخاصمنا واستغلت الموقف لصالحها وسحبت اسمهان لناحيتها!!مرام:أقدر أحلف إنها مو مندمجة معاها بس ودها تغيظنا!!
رانية:حريمتها هالعبير تسرق مننا اسمهان والله لأسحبها من شوشتها وأمسح بها مكتب المديرة!!
نجلاء: تكفين ياسوبر مان!! كلها يومين ومردها تزهق منها وترجع لنا!!&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
جاء يوم الاثنين والحال على ماهو عليه اسمهان مطيحة عند عبير وصاحباتها نادية وهالة!
ولما جاء وقت الفسحة قالت رانية: ودي أتحرش فيهم وأنكد عليهم!!
نجلاء: تكفين انثبري! على بالك ماحد يحب اسمهان غيرك؟! كلنا نحبها..بس بنخليها على راحتها ها الكم يوم!
رانية: ماأقدر فيني غيظ..موب قادرة أستحمل!
أفنان: صادقة....الشلة ماتسوى من غيرها!
مرام: ليش مانكتب لها رسالة؟!
رانية: لا رومانسية حضرتك!! ليش مانهديها باقة ورد أحسن؟؟؟؟
اسمعوا بأروح جنبهم وهم ياكلون على الطاولة!
نجلاء:ليـــــــــــــــــش؟؟؟ معاك بيبسي وودك تصرفينه؟؟؟؟؟؟؟
رانية: لا بأروح أغني لها!
نجلاء: من زين صوتك يا العرة!!
مرام:وش بتغنين؟؟ والله لأوريك شي مابعد شفته؟؟؟؟؟؟؟؟
أفنان: مو ناقصين مسخرة واللي يعافيك تعالي واقعدي...
رانية:بأروح يعني بأروح وماني مآذية أحد!! بأغني بس!
نجلاء: مو أكبر أذية بالدنيا إنك تجبرين الناس يسمعون صوتك العذب...لأنه بيكون أشد عليهم من مية طراق!!!!
الشلة:هههههههههههههههههه :P :D

وراحت رانية الهبلة جنب طاولة اسمهان اللي كان قاعد معاها عبير وهالة ونادية وقامت تغني:
حســــــــافة هالصداقة
يابايـــــــــعة الرفـــاقة
والسبب وردٍ ببـاقة!!!
ناظرتها اسمهان بسخرية وأعطتها تشميقة قوية!
قالت عبير بهمس:ردي على هالخبلة!!
وقامت اسمهان ترد:
ياشين هالطفــــــــــــاقة
تفاهة ومـــــــــــــــلاقة
بفرقاكم رواقـــــــــــــــة!رانية:
مردود كلامك يالزينة ومنقود
تبدلينا حنا بشلة كلها قرود؟؟
قامت عبير بوجه رانية وقالت: احترمي نفسك!!
أشرت اسمهان لعبير بالسكوت وقالت لرانية:
صحبة هالشلة تنشرى عندي بنقود
والقردة انتي! وشلتك كلها قرود!!!
صاحت رانية وقالت:لاااااااااا مصختيها عاد! وش سوت لك هالجنية أخاف دنبشتك؟؟؟؟
اسمهان: رانية حبيبتي..شفتي ذاك الجدار اللي جنب باب المقصف؟؟
رانية ( بفرحة مو مصدقة ان اسمهان تكلمها):إيه شايفته حبيبتي!اسمهان: كلمة وحدة تقولينها...وبقدرة قادر بتلاقين نفسك منسدحة جنبه!! فهمتي؟؟؟ يلا توكلي !شلة المقاريد بانتظارك!!
وراحوا شلة عبير يضحكون..ورجعت رانية مكسورة الخاطر!!
.................................................
*******نتبع********

وآآو والله روووووعه

تسلميييييين

آنتظر البــآرت القـآدم

» حسناء القطار... روايه رومانسيه خطيرهـ...
» من روايه اجاثا كرستي : جريمه في بيت الطالبات
» (العالم الاخر- البارت 2 ) >تاليفي< (روايه رومنسيه )
» سجين الموت روايه انمى رعب لو بتخاف ما تدخل
» 0 درس عمل > > سيف الرحمن < <

***&روايه اسمهان وعبد الرحمن***&

&روايه اسمهان وعبد الرحمن&