الحياة من غير فيسبوك
تخيل يوم تفتح جهاز الكمبيوتر أو اللاب وتحاول تدخل على موقع الفيسبوك زي ما بتعمل كل يوم فجأة مايتفتحش ... تشك إنك كتبت كلمة السر غلط فتعدلها مرات ومرات ... تتصور أنه عيب فني طاريء أو الحكومة حبت توجب و قطعت النت تاني ... تتصل بإصحابك وتسألهم يقولو لك إلحق الفيسبوك ... إ.إ...إختفاااااا !!!! .
تحس بصدمة هايلة كأنهم بلغوك بوفاة عزيز ... توقع دماغك تحت الأسئلة إللي هتدق رأسك: إزاي هكلم صحابي وقرايبي ؟ وإزاي هنفس عن إللي جوايا من مشاعر ؟ وهحط فين تعليقاتي ومداخلاتي الرزلة على الأحداث ؟ إزاي هاعوض ملايين الصور والرسايل إللي تمثل سنين من ذكرياتي الغالية ؟ وهاعمل إيه في الوقت الفاضي ؟ والسؤال الكبير إزاي هيكون شكل العالم من غير فيسبوك؟
وأنا هاشرح لكم شوية سيناريوهات المتوقع أنها هتحصل في حالة إختفاء الفيسبوك.
• مظاهرات في عواصم العالم للمطالبة بعودة الفيس بوك.
• تزايد معدلات الإصابة بالإكتئاب و افتتاح مراكز متخصصة في إعادة التأهيل بعد الصدمات الإلكترونية طبعاً.
• إقبال شديد علي تحميل أغنية "راح" لعبد الحليم حافظ و "عايش و مش عايش" لعمر دياب.
• أنهيار المشروعات الهبلة اللي بتعتمد علي الفيس بوك في التسويق و طبعاً إعلان الإفلاس والصلع المبكر لأصحابها والنحافة والتخانة وأمراض السكر والشاي.
• تفشي جميع أعراض الحمي الألماني و التخلف العقلي والشلل الكلي والرباعي وجميع انواع الصداع والقراع والأمراض العقلية والنفسية والعصبية... ربنا يعفينا .
• أنتشار ظاهرة أحتضان التروماي والقطار والنوم تحت العربيات وهي ماشية.
• ظهور رياضة القـفـز من البالاكونات والغطس في أعماق البلاعات .
• ارتفاع فواتير الموبايل والارضي بعد الرجوع لإستخدام الوسايل البدائيه ديه.
• انعدام الرغبة في التصوير لأن الصورة محدش هيعلق عليها ولا يشوفها.
• الرجوع للعبة زوما والألعاب العادية العقيمة ديه بعد إختفاء المزرعة السعيدة .
• تزايد ملحوظ في الخناقات بين الأزواج والاصحاب بسبب نسيان مواعيد أعياد الزواج وأعياد الميلاد والمناسبات إللي ملهاش أي 100 مليون لازمة !!!
• أختفاء روح الفكاهة بعد إختفاء النكت والتعليقات الساخرة .
• تويتر يكسب الرهان ويربح الصدارة مع إنه مش هايملي الفراغ إللي سابه المرحوم فيس....ألف رحمه ونور عليه.
• فوز برنامج "حكاوي الفيسبوكاوي " إللي بيعرض ذكريات الفيس بوك , بجايزة أحسن برنامج في سباق رمضان و مسلسل "الحب في زمن الفيسبوك " بجايزة أفضل عمل درامي .
ده مجرد تخمين للي ممكن يحصل لو إختفي الفيس بوك , عشان كتير مننا بيعتمد عليه بشكل مرضي وأوووفر وأنا بأدعوكم للمشاركة بتخيلاتكم للمستقبل من غير فيسبوك ومستنيه رضوضكم ... :ljklj: :ljklj: :kcfkdk: :kcfkdk:
:[[tt[t[t[t[: :[[tt[t[t[t[: :[[tt[t[t[t[: :[[tt[t[t[t[:
2012-06-28, 1:32 am
