| يدتي امي العوده .. طيبه من نسوانا لول |
| اقعديت مره معاها قلت لها سولفي عن اول |
| ابي جمن سالفه منج تذكرين ايامج اول |
| اوصفي لي شلون اهلها كانو اكراه والا اشكل؟ |
| علميني شلون زمانج كان مثل ما نشوف او اكمل؟ |
| اضحكت مني وقالت هذي شي يا ولدي كمل |
| لا تذكرني بزمان ليته بس شويه طول |
| كان ابوك العود ياولدي لين لبس زين وتعدل |
| قلبي مايتم في مكانه وعيني عنه ما اتحول |
| ولين مشه صرت نعاله وانتفخ ثوبه الململ |
| ولين تحنحن او تخنخن كل دراشينا اتقلقل |
| كان يبل .. له هيبه حلوه .. ولين ضحك ويه يتهلل |
| مو بمثل سبلان زمانكم هالرخو الي يتدلدل |
| كشة الراس جنها عشه هذي راس واحد مخبل |
| يصلح الواحد من ذولا في الدكاكين والله سمبل |
| قلت بعد يا يده با سأل.. قالت شقد اتسأل |
| قلت لها يوم كنتي شابه صغيره قد حبيتي احد؟ |
| اضحكت وايد وتمت تنتفض والدنيا مو ابرد |
| قالت استغفر من الله لا تكفر يالهيس الاربد |
| كانت البنت في زمانا في السكيك مول ما اتردد |
| لو اطلعت من بيتها مره في السنه اتروح اتحمد |
| ولو اطبقوها امن الدريشه تطل .. امن الخوف اتبريد |
| مو بمثل ايامنا هذي تمشي في السوق واتصيد |
| قلت لها اشكان يهازج وجم دفع في مهرج اليد؟ |
| قالت اشوية ربابي ما اتعدا ترسة اليد |
| واليهاز كان بقشه عوده كل شي فيها امكود |
| فيها دفه ام عمايل صوف من اللماع الاسود |
| وثوب نشل ومحلا كله بزري صج ما يتيعد |
| وفيها ميداسين وملفع نغده من مبرع مورد |
| والمشط سيسه مضروسه ما اتعوا وما اتمدد |
| وقالبين صابون بناتي الي رحيته ريحة الورد |
| وحنه عيار في خريطه وتوله دهن العود او ازيد |
| قلت لها هذي يهازج يدتي.. قالت انا اشهد؟ |
| قلت لها يا يده سولفي لي عن الليله العظيمة |
| ليلة الزفة الي راحت واصبحت اخبار قديمه؟ |
| قالت الزفه خذوني مريم وبنا وحليمه |
| في وسط زوليه حمرا بالغصب جني يتيمه |
| وقالو اسم الله عليها وهالحسن الله يديمه |
| ودخلوني الفرشه وآنا خايفه خوف الله عليمه |
| العروس فأيامنا جانت تستحي وعاجله وفطينه |
| والعروس فأيامنا هذي تقضب الزوج من يمينه |
| رافعتن رأسها كأن فوق ويها ايلود متينه |
| وتمشي مستانسه اتضحك ولين تعب زوجها تعينه |
| قلت لها هذي تمدن وكل زمان سلكه وفنونه |
| قالت أي سلك واي تمدن كلنا من نفس العيينه |
| يدتي ما تدري عني ان لي ايام حسينه |
| ما كأني في زماني في الفريج كنت اتمشى |
| شاربي كان توه بيطلع والشعر فوق راسي كشه |
| والبنات من كل دريشه وكل اقاشي ما اتغشى |
| هذي تضربني بعنقيشه وهذي تحذفني بغرشه |
| وآنا ماشي في طريجي ما ارتعش مول حتى رعشه |
| هذي سالفه من سوالف يدتي الطيبه الوحيده |
| قلت لكم منها وباجر اليبي زود بازيده .. |
2017-09-11, 5:53 am
