عهدي بهآ مِن قبل تلبس عبآيه ^

عهدي بها من قبل تلبس عبايه
.........................وأنا بعد قبل البس شماغ وعقال!!
طفلين نتهجّى حروف البدايه
.........................الله يا محلا سواليف الاطفال!!
كانت لنا في كل شارع حكايه
.........................وكنّا نقول علوم ماهيب تنقال!!
وكنت اتقاسم مامعاها معايه
.........................من(إسكريم) التوت,للعلك ابوريال!!
وكانت بعكسي شاطره بالقرايه
.........................تقرأ جزء عمّ وطه والانفال!!
وأنا لك الله من مواري غبايه
.........................مدري ابو نقطه هو الذال او دال!!
وكانت لأبويه تشتكي من شقايه
.........................وتعلّمه كيف اربط الباب بحبال !!
ياما على ظهري كسر من عصايه
.........................يقول لي:خلّك وأنا ابوك رجّال!!
وامي تقول: إدع لولدك بالهدايه
.........................خوفي تصيبه كثرة الضرب بهبال!!
لاشفتها مع اول الدرب جايه
.........................مدري أنا اللي ملت ولاّ الوطا مال!!
آحسّ قلبي يرتجف في حشايه
.........................ماكنّه الاّ الضيف لاهزّ فنجال!!
ياما عن"السّحلي" تخبّت ورايه
.........................لاخوفوها فيه ثم شافت ظلال !!
تقول:خلّك ياحبيبي معايه
.........................واسّتأنس العب عندها دور الابطال!!
وآغار حتّى من عيون اصدقايه
.........................لاطالعوها قلت: تكفون ياعيال !!