السلام عليكم و رحمة الله و بركاته
أنا صراحة أبغى آخذ آراء الأعضاء الغالين
عندي مشكلة و أبغى أستشيركم بالحل
أنا أسمي ( حصه ) من العصور القديمة و هذا الاسم موجود
و أنا ما أحب اسمي ابدا لأنه يفشلني دائما
خاصة بالاماكن العامة يعني مثل المدرسة
أبغى أكتب أسمي بالقائمة أناظر الاسماء أحس أسمي داخل عرض بينهم
مثلا ديم و ريم و ..................... الخ
اهم شيء أبغى أغير أسمي إلى ( شوق ) بس أهلي مو راضين لأنهم مسمينني على جدتي
أسمك و غصب عليك ترضين فيه لأنه ما فيه تغيير
و صراحه أنقهر مرة منهم مع العلم خواتي أسمائهم حلوة
أسماء حضرية مثل الأوادم
أبغى أحس أني أنسانة أعيش على وجه الارض
ولي كرامة مع أن أسمي يحوم الكبد و ماله دلع مثل الخلق
مثل :
( حصحص ) أحس أسم حمار
( حصو ) أحس واحد ما لقى له دلع لفقها
( صوصو ) أحس كأني صوص بس باقي يصبغونني أصفر
( حوحو ) أحس كأن حلق الي يناديني مبحوح
أخواني أبغى حل بكل الأشكال و شكرا