مذكرات اندوميه\شوشتي ياعقدتي... جعلي ما افقد شوشتي

عندما تمتلك شَعَرًا.. فهل ينبغي بالضرورة أنك شاعر ؟
عندما تمتلك شَعَرًا .. فهل هذا يعني أن تكون لديك قُذلة ؟!
عندما تمتلك شَعرًا .. فهل أنت راضٍ به ؟!




شوي وجاية : )

لنا ولله الحمد يمتلك شعرًا فوق رأسه < حسيته عش على وصفي
وتتنوع الشعور من شعور مفلفلة وشعور سايحات ملبدة مفلبنة
< مأخوذة من فلبينو
وشعور متموجة مغرورة , وشعور مشقصة تمامًا كأعواد الخشب والحمدلله على كل حال

وكل واحد يشكي من شعره ! وكلن كاره شعره ! وكلن مضايقه شعره !ومحد معجبه شعره

ومنا من لاوقف عند المراية خصوصًا الفتيات .. تطلقن فتيل الشتائم على شعورهن ..
ان كان سايح مفلبن وتبيه ويفي فتقول حسبي الله على هالشعر اللي عيّا ينلف معي
جعله اللّوف واللّفة اللي تلفه =/ لدرجة انها تشك لاتكون من سلالة عائلة فلبينية ؟!
< توصل الأفكار كذا لحد يستغرب
وأم شعر مشقص تكب عليه زيوت الأرض كلها من خروع وزيت الزيتون وزيت الصبار والخبار والعبار
حتى تنعّم وتهجد أطرافه اللي كنها انفجعت بليلة ما بشوفة اللي ماينشافون

وأم شوشة .. وفي رواية أم كشة .. وفي جريدة أم فلافل = ذوات الشعور الكيرلية .. هي قصتي اليوم ..

استمعوا بإنصات

يوميات شوشة بالروضة :

اسمي شهد شعري شوشة وأكشش كشة بالعالم
ربي معطيني بنية صغيرة وبركة الطول والحجم كلها جاية بشعري
يعني شوشتي كبيرة أكبر من وجهي < عمركم شفتوا شوشة كذا؟ ما أتوقع عمومَا كنت طفلة ما أدري عن نفسي
رحت أول يوم بالروضة بعد معاناة طويلة من الشد والجذب والحفلات الإقناعية والمراضاة عشان أبدا أداوم في مدرستي اللي كانت بالنسبة لي
بيت أشباح ميب مدرسة .. كنت رافضة أداوم فيها بتاتًا البتة
كنت أستغرب من اصرار أمي يوم تبيني إلا غصب أروح
وأقول بيني وبين نفسي ياناس بيت أشباح تبون أروح للموت برجلي ؟! < مستحقرتهم جوا نفسي
آخرتها مسكتني أمي مع شوشتي وقالت : اسمعي يا أم كشة .. بكرة تروحين المدرسة ولا أحلق شعرك صفر <
< جلطة وانهيار وأنواع التعذيب النفسي الله يهديتس يمة
طبعًا أنا شلال صياح عجزت أتخيل إني أفارق شوشتي ؟! شلون تجيب أمي بكلات لي ولأختي اللي شعرها ناعم وما ألقى مكان أحطه فيها =/
وبالأخير رحت ..
من دخلت بيت الأشباح عفوًا المدرسة
وأنا متشبثة بعباية أمي بشدة لين من شدة ما إني ماسكتها فجأة وإحنا نمشي رجولي جت فوق عبايتها وتكرفست أمي وتكرفست فوقها وصار شكلنا يفقع ضحك
أم وبنتها طاحوا على الأرض ههههههههههه
قامت أمي وشالتني بس معطت شوشتي معطة أليمة من ورا عبايتها عشان مرة ثانية ما أمسك عبايتها بهذلت أم أمها بس الحمدلله محد شافها وهي تمعط شوشتي
المهم وإحنا نكمل سيرنا جت أمي تبي توريني المدرسة وأنا أعيي
وهي تحاول فيني : شوشة شوفي مدرستتس وفصلتس يالله الجنة < حتى يدلعوني شوشة ياقلب لاتفطس حزن
يلا روحي لفصلك وتعرفي على صديقات جديدات وشوفي معلمتتس الجديدة الدبية ذيك وش ملحها <

وأنا ماش عجزت أناظر شيء .. تخيلوا كانت الحياة مظلمة في تلك المدرسة وكل شيء سواد في سواد < بلا وجهتس كله لا يزال داخل بعباية أمتس يالرفلا
وأكملت أمي حديثها : شوفي المعلمة حتى عندها شوشة زيتس
ومن هالكلمة فتحت عيني الناعسة لترى النور بعدما كانت لاترى الا الظلمة
وخلاص راح الحيا سبحان الله جاني شعور التوافق اللي لا صار حد معاناته زيك يهون كل شيء خخخ
وودتني الفصل أميمتي وشفت بنات كثير كبري كلهم من أحجام 6 أشبار يالبينا وإحنا أقزام بس
جت المعلمة الإندومية عندي وقالت وش اسمك ياقمر؟
قلت بكل براءة : اسمي شوشة جت أمي كبّرت عيونها في عيوني على أساس تنهرني
وقالت وهي متفشلة مني وتبوسم اسمها شهد شهد وش شوشته الله يشوش ابليس
المعلمة قامت تضحك وتصرف وأنا منكسر خاطري وراها ماقالت لمعلمتي دلعي ليش تقول اسمي
< ع أساس إن هذا دلعي
ومسكت المعلمة بيدي وودعتني أمي ورحت فصلي .. جلست جنبي وحدة من طقة الشعور السايحة
ناظرت شوشتي بشزر بس أشوا ما قالت شيء
عاد أنا كنت حاسة إنها معجبة ف شعري بس ميب قادرة تقول
وإحنا نلعب لعبة بالفصل صعقت ولد بالغلط .. جاء قال لي بسرعة : وخري يا أم شوشة
وفجأة صار كل الفصل يضحك ويقول أم شوشة .. أم شوشة .. أم شوشة .. أم شوشة
جت المعلمة هجدتهم بس بعد ايش بعد ماشوي وينقلب الفصل أنهار من شلالات دموعي
يا إني بكيت ذاك اليوم بكاء لين وصلنا البيت وأنا أشاهق
حسيت بصدمة نفسية وحضارية والله يا انها كسرة خاطر
وانتهى يومي الأليم في روضتي وكانت أول مرحلة في استيعاب شوشتي

المهم تاليتها أم شعر سايح واللي حاقرتني بنظراتها صارت صديقتي
كنت أخق عند شعرها وهو ويطير اذا جاء هوا .. وأنا مايطير !
بغت تنكسر رقبتي ذيك المرة وأنا أطلع راسي من لعبة القطار اللي بالمدرسة كله عشان أشوف كم خصلة تطير
وخانتني شعيراتي مع الأسف ما طارت ولا شعرة
حسبي الله عالخيانة بس

وجاء ذاك اليوم نتدرب عالحفل الختامي ورصتنا المعلمة فوق المسرح
كان مكاني أنا وصديقتي بوسط المسرح , مدري وش مقردني يوم ماحطوني الا جنب صديقتي
ومن ثمّ بدينا نسوي الحركات مع الأنشودة ونشوقل يديننا يمين يسار ونقوم ونجلس أبد شريط ثاني من كليب طائر النورس ..
جت حركة هزة الراس اللي نطيح شعرنا من جهة اليمين ثم نروح لجهة اليسار ونكرر الحركة
< عمرك وحياتك كلها لاتشرحين =/
شفت صديقتي تسويها وشعرها يطيح معها من الجهتين .. ضاق صدري وراه ياكافي مايطيح شعري زيها ؟!
وكل ماجينا نسوي هالحركة صرت أتحمس وأنزل راسي بكل ما أملك من قوة .. و كل هذا في سبيل يطيح شعري زي صديقتي ..
و مع الأسف كانت محاولات يائسة ماجنيت منها الا ان راسي خبط بالأرض من شدة الحماس
وخربت عليهم التدريب بصياحي =/

يوم صارت آنسة شوشة بالإبتدائي :


يومني برابع ابتدائي كنت أشعر إني كبيرة أكبر شيء بالحياة وأحس إنّي بطلة وشلتنا شلة وناسة ورجة
وطبعًا كل خيالي ذا أبعد مايكون عن الحقيقة خخخ .. كنا بزران وشلتنا أكبر ورعنة بس مشكلة الثقة على لا شيء
ومع كل مقومات السعادة بالأعلى كانت نفسيتي بالحضيض
عرفت وش قصد أهلي يوم يدلعوني شوشة أثره موب حبًا فيني ولا لأجل سواد عيوني أثره لأن شوشتي وش كبرها
وخلاص من عرفت نيتهم الفاسدة صرت أتكرن لا نادوني بذا الدلع < أتكرن من تكرن التكروني اذا تكرن وعصّب
مو معقولة يصدمني مجتمعي اللي حولي بشيء جديد كل يوم
المهم أمي كانت أكثر وحدة تراعي نفسيتي كانت تقومني من النوم تقول قومي ياخروفة أمشط شعرك <
< كمان على أساس إنّ شعري زي شعر الخروف حسبنا الله وكفى .. لا أبو أبو المواساة اللي كذا يا يمة
وتمشط شعري كل صبح قبل لا أروح المدرسة وتدهنه بذاك الكريم الأبيض لين يقول شعري بس وتفرقه من قدام وتسوي لي جديلتين
وبذلك يصير شعري مرتب ويبدو كأنه ناعم وهو ماطبه ولا ماحافت النعومة < تلعبين على مين بالكريم
تطاقيت أنا وصديقتي ذاك اليوم لأنها فقشت علي تقول أنا مسلفتك ريال أمس رجعي لي اياه !
شكيت بعمري ؟!
وهي نصابة تسذوبة ماخذت منها ولاهللة بس شكلها ناسية فلوسها وماتبي تشحذ وقامت ألفت هالفقشة
قلت لها انقلعي مانيب معطيتك ما أخذت منك فلوس
عصبت وقالت بقول للمشرفة قلت قولي لها أصلاً أنا ما أخاف لا منك ولا منها < قوية خخخخ
عاد صديقتي حست إن الفقشة حقتها قرب يخلص مفعولها لأنها مابتجرؤ تقول للمشرفة وتسوي سالفة وهي نصابة
خخخخخ
ختمت طقاقنا بكلمة لامست نقطة ضعفي وهدمت الحياة في ناظري وجعلت جدايل أمي في عيني ولااااا شيء

تمنيت انها راحت للمديرة ووزير التعليم وشكتني عنده بس ماتقول هالكلمة =/

قالت بأعلى صوت : يا رقية " عشان الجدايل " يا أم شوشة يا أم شعر فلافل كاااك
وفجأة البنات يضحكون بأعلى صوت ويقولون : ايييه صح إنتِ أم شوشة يا أم شوشة هاهاهاها <
أنا تنحت وعيوني طارت المشكلة اللي ضحكوا معها صديقاتي
كفارات العشرة مسرع قلبوا علي جعلهم اللي منب قايلة ..
وياضحك منهم ..
و يامشاهق وصيااااح مني .. وينعاد مسلسل الإنهيار وشلالات نياقرا في عيني

[ وش ذا الناس اللي مايرحمون كم مرة شاهقت بحياتي ماتسوى علي وقسم ]

شوشة في المنزل :

يوم كنت سنة خامس برمضان < خلاص صرت حرمة
جالسة أنا وإخواني وأبوي نتفرج ع طاش ..
انتهى طاش وصار فيه دعايات وبعدها يبدا مسلسل جديد < الله من الدجة ضاع أجر الصيام كله =/
أثناء ذلك الوقت .. فجاة لف علي أخوي اللي أكبر مني بشوي أبو شعر هندي وقال : الحين ورا انتِ شعرك كشة؟
هالمرة استجمعت قواي وحاولت أني أخلي الدموع تضيع درب عيني < متعوب عالجملة
وقلت : وش دخلك ؟ أنا شعري عاجبني !
لف على أبوي وقال بكل وقاحة حسبنا الله وكفى : يبا .. متى بتجيب مقاضي البيت؟
أبوي كان لاهي عننا ولا كان بيرفع الجور والظلم عني : بكرة ان شاء الله .. ليش ؟
أخوي : لاتجيب لنا اندومي عندنا كشة شهد تأكلنا وتشبعنا وزيادة هههههههههههههههههههههههههه
وجهي بالتدريج : - - -
من شدة قهري وانهياري من الكلمة قمت نطيت عليه أبي أضربه بكل ما أملك
جاء مسكني من شوشتي ومعطها معطة زين ماقشعته من جلدي
أبوي يوم حس ان السالفة فيها إنّ جاء فك يده من براثن شعري وكفخه لين قال بس
وأنا لا تسأل على حالي والقلب مهموم قمت أترنح ماأشوف الدرب من الدموع من شدة الإنهيار النفسي
وخابطت في الجدران وخبطت ف باب المطبخ وطحت لأني حاطة يدي على وجهي من الصياح < بؤس
مسحت دميعاتي بس الشهقات ماوقفت يوم جيت بقوم وبمشي بروح لغرفتي الا فيه شيء يمط شوشتي من ورا بأقوى ماعندده
وأصرخ ذيك الصرخة عشان يسمع أبوي ويجي يكفخ أخوي مرتن ثانية
يوم ألف مافي لا أخوي ولا ظله أثر كشتي نشبت في مسكة باب المطبخ !
وهات ياااصياااااااااااااااااح <
كانت ليلة شلالية بذمة وضمير
وأخوي البغيض ماتاب من حركات الطنازة فيني ماسك فيني شوشتي وأنا ماسكة فيه دويرة جسمه خخخخ
و24 ساعة حالة مكافخ في البيت أنا أبقسه في نقطة ضعفه وهي كرشته وهو بس يدخل يده شعري
ويصير يحركها يمين يسار لأنه يضمن نشوبها وضمان عدم افلاتها
المهم أصبحنا ذاك اليوم ولاحد حارشني ولحد قال يا أم كشة ولا أم شجرة ولا شجرة الصبار
يعني بزعمي إن اليوم بيمر على خير
جت بنت عمي عندنا وكانت تعرف تتكلم انجليزي زين
وكان شعرها ناعم < آآآه ياشوشتي ياعقدتي
كانت بالنسبة لي العالم الهلامي والسراب اللي مستحيل مدى الزمان أوصل له
لأن فيها كل المميزات اللي أشعر إنها ميزات مابعدها ميزات بالحياة
وهي انها ترطن انجليزي وشعرها ناعم .. ايش أكثر من كذا؟! ههههههه
قمنا نتفرج أنا وهي على كرتون سندباد وجاء أخوي المدوّر كالعادة يبي يحارشني ويستفزني بشعيراتي المنتفشة
جاء لبنت عمي قال تصدقين يا وعد ان عندنا سلك مواعين بشري ؟!
< حقير
قالت وشلون ؟ قال أبد شوفيها اللي جنبتس شوفي شوشتها مو صح تشبه سلك المواعين ؟!
بدأت الدموع تتلألأ في عيني وأنا مسمرة عيوني على الكرتون تسني مندمجة ولا جبت خبر
الا وقال يبي يقهرني زيادة : احنا غير عن كل الناس مانشتري سلك مواعين دايم شهد تساعدنا لما تغسل مواعيننا ..
ومن هنا .. انهيااااااااااار جديد
أصلاً مانزلت الدموع على طول أول شيء شهقت شهقة ثم بعدها تسربت الأنهار حيثما أجراها الله
أخوي تسدح من الضحك وبنت عمي حامت تسبدها من شكل دميعاتي شافتها مليون ألف مرة بالحياة
وصارت دموعي المنهمرة بلا قيمة عندها
جت بنت عمي قالت : يووه شهد بليز ستوب كراينق ! ما أمداها تكمل كلامها الا وأعطيها ذاك البوقس على وجهها
عجزت أصبر عليها هالمرة خخخخخخخخ

وأمسينا ذيك الليلة ثلاثتنا نبكي .. ثنتين صياح صدقي والثالث يبكي من كثر الضحك ..
< ضحكة بلا سن يالدب

.
.
.

شوشة يوم صارت حرمة < بالله



وأخذت عقدتي من شعري تزداد يومًا بعد يوم و وطفح الكيل عندما صرت بالمتوسط
وكنت أرى البنات يقصون غرة تسقط على وجيههم وأختي أم شعر سايح قصت غرة وعيوني تغرغر وقلبي يخرخر غيرة لما أشوفها تطيح الغرة على وجهها
ومن هنا أغرتني الغرة إني أقص زيها وتصير عندي غرة

لكن أمي قالت وش غرته يابعدي خلي شعرتس يهجد وينعم ولا نفرده ولا أي شيء ثم نقص لتس وقتها غرة , إن شاء الله لو تبين من كل الجهات < يقطع أم المواساة
وصوت عالي ينبعث من الصالة : الخروفات مايقصون غرة هاهاهاهاها > حسبي الله عليك يالدب



واستمرت سلسلة المعاناة إلى أن وصلت للمرحلة الجامعية ..
تقل بديت أتفطن لعمري وصرت أسوي موديلات تناسب نوعية شعري
و طلعت موضة الشعر المفلفل مدري الملفلف وطاحوا الناس بالكيرلي والكدشات وكلن صار يطول شعره عشان يصير كدش
وصار أحلى شعور عندي بالحياة لما أشوف الكدشات تكثر من حولي
< أقطع القلب صح؟
البنات صارن يحطن جل وصارت أم شاعر ناعم اللي تتهزا فيني تخربط شعرها وتحوسه تحوسه وتقول به لين يأذن شعرها بس بكيفه أهم شيء يصير كيرلي ..
البنات كشش والعيال كدش
وصرت مروقة عالأخير لأني تخلصت من عادة مشط الشعر
أبد أتروش وأترك شوشتي على مصراعيها
وأروح الجامعة والكل يأشر على شوشتي ويقول ياحظها يازين هالشوشة ياليتنا شوش و و الخ هههههههههه
حسوفتن على شلالات الدموع اللي ذرفتها ليتني رضيت بشعري وهو قسمة ونصيب من الله
كلن ربي منعم عليه بس النفس جشعة ماتشبع
اللي شعرها ناعم تتهنى فيه وبنعومته أصلاً الشعر الناعم دلالة عالنعومة
والأنوثة والرقة
والفتنة < كني زودتها شوي؟
يعني ماتحتاج لمحرق الشعور السيد سشوار الا نادر أو ان سشورته ماتجلس تسشوره ساعتين الا شي < آخر مدحة خلاص
واللي شعرها كيرلي عاد جاء الفرج وجاء دورها الحين تفرح الموضة على أساس شوشتها خخخخخ خلوها تفرح شوي يا أم شعور ناعمة
ياما تدلعتوا طيلة السنين الماضية والحين جاء دورنا
والفتاة الكيرلية الحين ان بغته ناعم حرقته بالسشوار لين يهجد
وان بغته عالموضة لاقيته ان شاء الله

والمثل يقول :
ياحظ أم شوشة يوم جت الموضة على شوشتها < وشرايكم بمثلي القاتل؟



اندومية – أسبوع الشجرة – خروفة – أم شوشة – أم فلافل – شمس -

صارت كل هالمسميات أعلاه تدليعاتي يعني كل سبة صارت مدحة وكل شيء صار في صالحي
< الله يالدنيا صدق الدنيا ماتدوم على حال صدق انها زايلة وماتسوى
الصياح الا عالشيء الكايد صدق انّها < لايكثر

الحمدلله الذي استجاب دعواتي عندما كنت أدعو أن أقوم من النوم وألقى شعري ناعمٍ سايح
بس ربي عوضني بشيء أزين وخلا شعري اللي موب بس يملا عين القريب صار يملا عين العدو < ياااااهوووه

وفيس يناظر:
1- الولد البغيض اللي جرحني في يومي الأول بالروضة
2- وصديقتي الخاينة بالإبتدائي .
3-وأخوي الدبي .
4- وكل بني آدمي عقدني وتهزا بشعيراتي ياجعلي ما أنحرم منها .

وأقول لهم
موتوا بغيظكم ياقطاع الطرق ! .. ايه قطاع طرق قطعتوا علي طريق النجاح بذباتكم وتحطيماتكم البغيضة

وأختم قصتي بـ : يالله لك الحمد يومني بشعر خروفة

كان معكم : شهد .. [ أم شوشة ] ..

.
.
.
.
.
.
.
.
.
.
.
.
اللي فوق قصة خيالية ألفتها من مخي كمحاولة لتقمص نفسية إحدى أطراف المجتمع لكن بأسلوب اقلاعي
لا تمت لواقعي بصلة ولا حصل لي ولا موقف من اللي ذكرته < لحد يبثرني بالتقييم مسوي قافطني
وحدة من المواقف صارت لصديقتي خخخخ دخلتها بقصتي وزودت عليها شطة وايدام وفلفل رومي
مالها هدف الا ادخال السرور والمتعة لقلوبكم ومحاولة ارضاء واقناع الجميع بشعورهم
ناظروا المخرج عاليسار تحت
والباقي لكم ^_^

















شوشتي يا [ عقدتي ] جعلي ما افقد شوشتي !

يآهلاآ والله محبه

كيفك ان شاءالله بخير

وآآو القصه تجنن جدداً ...قريتهآ حرف حرف

مررره رووووعه ...وصرآحه الحين اقتنعت بشعري =)

ايه والله المفروض نرضى وبيصير أحلى شعر بالدنيآ خخخخ

طرحتي فأبدعتي بججد ...تسلم إيدينك ياعسل

+

ليسَ في القسم المنآسب ^_^

هلااااابك
اخبارك كيفك شلونك كلها جوابها واحد الحمدلله بخيير ههه
يعني سويت خير اقنعتك بشعرك ههه
نورتي والله


اجل باي قسم؟؟

ينقــــــــل
ولي بآكـ ان شاء الله مع الــرد ^.^