السلام عليكم ورحمة الله وبركاته
[center]هالقصة خياليه غير واقعيه حدثت في احد ربوع احياء الرياض وهي تحكي عن 4 بنات وها هنا بعض المعلومات الشخصية عنهم:
دانه:18 ربيعا ثانوية عامه تخصص ادبي وانواع التفحيط بالمواد (سكنها الاصلي,,,,,الخبر)
سارة:20 خريفا اولى جامعة تخصص اقتصاد وادارة منتسبه والله من فلة الحجاج والدجه(جدة)
حصة:اسمها مادري وش يبي بينهم بس ماعلينا 21 صيفا متخرجه من الثانويه ومالقتلها مكان يضفها غير البيت وهو فيه احلى من البيت (الرياض)عهود:22 شتاء لم يتعدى طموحها غير شهادة الثانويه العامه وقررت الارتباط بأحدهم ولكنها رفضت بنهاية الامر لانه خيخه وما عنده سالفه وهي الى الان تحتري نصيبها لعريس الغفله.. البنت تبي تعرس (القصيم)
وبعد ان تم استيضاح الملف الشبه شخصي عن كل وحدة نبتدي القصه المأساويه الي وراها هالاربع بنات:
بيوم الخميس الموافق 12/10/14وحطبه قررت كل من والدة دانه وسارة وعهود الاجتماع بمقر اختهم الكبرى اللي هي ام حصة بالرياض وذلك للشوق الجامح لمقابلة خشتها والاستماع الي محشتها بخلق الله وكان هذا القرار المؤكد بعد الزن المتواصل من كل من سارة ودانه وعهود على رؤووس امهاتهن الكريمات وتمت بحمد الله الموافقه على هيك قرار وفعلا شدو الرحال الى العاصمة الرياض وهنا حالة البنات لا توصف من كثر الفرحه كل وحدة مو صدقه انهم بيجتمعون بعد فراق دام 7 شهور واللي مخفف هالمعاناة مكالمات الجوال بنصاص الليوله والمسجات التي يتداولونها فيما بينهم .......
ام حصه:حصه ووجع انشالله وراك ما خلصتي خالاتك بالطريق كلها ساعات وهم عندنا وش انتي تحوسين به من الصبح
حصه:يمه وش هالدعاوي وش انا مسويه ابد قاعده الط الكحل والط الروج على خشتي ابي اتكشخ وش عندي (تراها نصابه قاعده تكلم بالجوال ولا هي يم خشتها)
ويقطع السكون الذي خيم على الجو بعد كلمات حصه الرقيقه صوت الجرس تن تن تن تن
واذا بناصر الاخ الاصغر لحصه يناقز من الفرحه لانه بيجتمع مع عبود ولد خالته وينقز ذيك النقزة الي مابعدها من نقزة وعلى الباب واذا بخشته ترتطم بوجه عبود وطاح صريعا بالارض
ام حصه : ازززين الا عشان تبطل رجتك اللي مالها سنع قم اشوف فز
طبعا اثناء ماهي تحاكي ولدها المصروع من الطيحه وترمقها اختها اللي هي ام عهود بنظرة الشوق واللهفه وبالاحضان هلا بوخيتي هلا بالغاليه وانواع التحفل (بشد الفاء) طبعا عهود ماطقت خبر لخالتها واذا بها تصفي الطبلون وتقلع لغرفة حصه وتفتح الباب وتلاقي طال عمرها نايمة على الجوال واذا بحصه تصرخ ذيك الصرخه وااااااااااااااااااااااااااااااااااااااااااااااااا
ااااااااااااااااااو وبالاحضان وحشتيني ياعهود وانواع السب وحشتيييييييني موت واخيرا اجتمعنا واذا بصوت الصراخ يعلو ويعلو ويعلو بعد ان دخلت سارة ودانه الى الاوضه قلبوها عزى من كثر النحيب والدموع المتلاحقه ويقطع هذا الاحتفال ابو حصه بصوته الاجش قائلا:حصه يامال ال؟؟؟؟؟؟؟؟؟؟؟؟ مشفر قصري حسك فضحتينا وش هالمسخرة والصراخ الي ماله سنع وانوااااااااع التسفيل طبعا ردة فعل حصه المعتادة انها راضت ابوها بكلمتين وقفلت الباب تك تك بالمفتاح منعا لاي احراجات من الفضاء الخارجي
طبعا ارتزو البنات فوق سرير حصه وكل وحدة طايرة من الفرحه لانهم واخيرا اجتمعو بهالغرفه الي عاشو فيها احلى اللحظات ومرت عليهم احلى ذكريات باتعس واجمل الايام البنات ماصدقو خبر انهم يتقابلون وانواع السوالف الي ماتخلص وكل وحدة تتكلم وتحكي وش صارلها في فترة غيابها الساعات مرت والدقائق تمشي والثواني مستمرة وهم ولا هم هنا الناس تغدو وتعشو وهم بجو ثاني غير جو العالم واذا بحصه ترمق الساعه وعقاربها تقارب 2:25 صباحا
حصه:شفتو يا بنات مر الوقت ولا حسينا مانتم جوعانين واذا بدانة الفتاة الدلوعه تنبس ببنت شفتها وتقول :يوووه يا حصه انا انا ميته من الجوع من امس ما كليت شي على الكيت كات الي كليته بالطريق واذا ببقية الشله يكملن بقية ما كانت دانة ناويتن تقوله فقالت حصه:طيب انا بنزل للمطبخ اشوف شي ناكله وانتم غيرو ملابسكم وخذو راحتكم الى ما اجي البنات قالو بصوت واحد:اوكيك بدون كيك(عبارة يتداولنها فيما بينهم للدلالة على كلمة OK)
حصه انسانه معشمه نفسها انها بتلاقي شي ينوكل لكن يوم دخلت للمطبخ لقت يدها والخلا ولا شي فيه ماشالله كل شي انوكل البنت ميته من الجوع والبنات دايخين بعد الطريق يبون ياكلون وش السواة قعدت تفكر قالت بسسسسسسسس لقيتها مع طقة الاصبع وطلعت تررررررركض تسابق الريح ودخلت الغرفه قالت شوفو يا بنات ترى الشعب ما تركولنا شي ناكله او حتى نسد جوعنا فيه وانا مافيني حيل ولا انتم نقعد نسوي تجارب بالاكل
فانا اقول يعني اقول المقصد طااااط يا بنات اقوول لو يعني اقول البنات ضربت فيوزاتهم قالو فكينا ترى ذبحتينا وشو تكلمي انطقي قالت اللي كنت باقوله لو ندخل مغامرة جديدة ونضيفها لسجلاتنا الحافله بالمسرات والكفشات ولعنة الجدف وش قلتو البنات طارت بوهتهم قالو بصوت واحد وش قصدك يا حصيصه انتي قولي وحنا قداااااااام معك بكل شي تسوينه قالت وش رايكم لو نسطو على بي ام مشعل اخوي المفتاح فوق الطاوله بالصاله والشعب نايمين ندق السلف واقرب مطعم يضفنا هاااااااا وش قلتو قالو قدااااااااااااااااااااااااااااااااام لعنبو ورى (عرابجه ذولا مو بنات)
المهم اتفقو البنات على انهم يطلعون بهالوقت يجيبون لهم عشى من برا قالت عهود يا بنات مانقدر نطلع بهالشيف(بفتح الياء) لازم نطق الثياب والشمغ ونتطلم لان لو العالم شموووو خبر اننا بنات بنروووح بخرايطها والا انتي وش رايك يا سارة قالت ساره الا اكيد هذا اللي كنت افكر فيه من شوي بس من وين نجيب الثياب والشمغ ردت حصيصه بصوتها الخاثر لاتشيلون هم هالموضوع خلوه علي انا ثياب مشعل تفكلنا ازمات بس انتم التزمو الهدوء وانتي يا دانه تعالي معي لانك خفيفه (بشد الياء) مثلي خلنا ندخل غرفة مشعل ونسحب لنا كم ثوب وبالفعل مرت المهمة بسلام كل وحدة تكشخت بهالثوب وطقو الشمغ وتسحبو وحدة ورا الثانيه لباب الشارع الخلفي واثناء السير اذا بسارة تنطق وتتكلم وتقول:الحين يوم انا طالعين وكلنا ثقه لا وبعد متعشمين خير من الي بيسوق السيارة ردت عهود قائلة:اقول اسكتي انتي ووجهك اللي يسمعك يقول وراك سالفه ازين شي استفدت منه بالقصيم السواقه بهالمزارع وتلقط المفتاح عهود ويركبون البنات دانه وساره ورى وعهود وحصيصه قدام وتطيح عين عهود على بكت مشيعل المالبورو وتقول حلللللللللللللو كملت وتسحبلها زقارة والبنات يقومون عليها انتي انهبلتي طفيها يالمهبوله مانبي مشاكل وووووو قالتلهم الحين لازم يضبط كل شي الثياب والشمغ والسيارة وانا اللي اسوق ومعي زقارة عشان يكتمل الدور واضبطه صح ردت دانه قالت ايه وهي صادقه عهودوه خلها عشان يكتمل الدور المهم سمت بالله عهود وتشغل السيارة وتدوس البنزين والبنات مبسوووووطين وتدق السلف وتمشي قالت وش تحبون تسمعون كل شي موجود يا حليله مشيعل راعي وناسه كلهم قالو نبي على ذوقك يا عهود انتي البيق بوس الحين قالت بسسسسسسسسسس مالكم غير جلسة عبدالمجيد وانواااااع التصفير
وفعلا شغلت الشريط عهودوه وصوت عبدالمجيد يلعلع بهالسيارة البلا انها ما تدل احياء الرياض وحصيصه تولت مهمة الدلاله قالتلهم وش تبون تاكلون كلهم قالو اي شي بس ماظنتي يكون فيه مطعم مفتوح هالوقت قالت ما عليكم اتركو هالموضوع علي انا بس وش رايكم ناخذلنا لفه بالتخصصي نوسع صدورنا ونستانس شوي ووقتها نشوفلنا مطعم يضفنا ونسد جوعنا فيه البنات عجبتهم الفكرة وقالو ازين ما قلتي يا حصيصه يالله مشينا عالتخصصي وبالفعل اتبعت عهود تعليمات حصيصه وهي رافعتن راسها محد قدها تسوق بي ام المهم قابلتهم الاشارة وهي تشير الى توقف السير واثناء ماهم واقفين رمقت دانه السياره الموازيه لها واذا بها شابان شلولحان (شلولحان=المثنى من كلمة شلولح والمقصود به الشاب الوسيم بهي الطلعه عريض المنكبين) وهي ترمقه بنظرات الغزل الشائكه واذا بسويره تركلها ذيك الركله اللي مابعدها من ركله فقد ارجعتها للواقع المرير الذي يعيشون به قائلة:انتي يالمهبوله تبين تفضحينا اثقلي انتي وخشتك اركدي واركزي وراك مسبهه قالت دانه:لاتلوميني يا سويرة من اللي قاعده اشوفه هالاشكال افتقدها بديرتي انا موووتي رززة هالاثياب والشمغ ادوووخ ماعاد اقدر واثناء ماهي تطلق هذه الكلمات العذبه واذا بالاشارة تتحول من الحمراء الى الخضراء مشيرة الى السير واخيرا وصلو بسلام الى الشارع المطلوب وهو شارع التخصصي وانواااااع الزحمة قالت حصيصه:عسى الله يستر من هالزحمه انتبهي يا عهود لاتوهقينا ترانا منا بناقصين كلهم مهبل وماوراهم الا المشاكل ووجع الراس تكفين ياخيه قالت عهود بكلمات تنم عن الثقه بكل حرف تملأه الجرأه:ماعليتس تراني قدها وقدود ردو دانه وسويرة:هذا العشم فيتس بس يالله شوفولنا مطعم ترى وصلنا حدنا ومن حظهم الحلو لقو مطعم لبناني على وشك ان يقفل استعدادا لصلاة الفجر واذا بحصيصه تنطق:عهودوه بسسسسسرعه اركني فيذا قبل لا يقفلون ..
عاد عهود مايحتاج نفذت المهمة وبكل سلاسه ركنت السيارة امام المطعم ولكن هناك مشكله صغيرة واجهتهم شلون بيطلبون؟؟؟قالت سويرة:الحين ممكن افهم شلون بنسد جوعنا وشلون بننزل لو نزلنا عز الله رحنا فيها قالت عهود:ابشششري بالخير بس خلني اعطي ذا اللبناني نغمتين من السيارة وثواني وهو هنا وبالفعل ارسلت عهود نغمتين بيب بيب بيب بيب واذا باللبناني يستجيب لدعوات تلك النغمات وبغمضة عين وهو عند الشباك :تكرم عينك حبيب البي شو هيي طلباتك والبناااات ساكتين خوفهم اصواتهم تفضحهم بس عهود تعجبكم راعية مواقف فكت اللطمه واشرقت بوجهها الساحر وانوثتها المتفجرة قائله:شف حنا 4 بنات بدون ضابط ميتين من الجوع مالقينا اللي يسد جوعنا والا ماكان طلعنا بهالحزة فلو سمحت هات المنيو بدون اي تساؤلات او تعليقات وماله داعي احد يدري بهويتنا الحقيقيه طبعا اللبناني كان متنح ومن قلب مايدري وش يقول بس سحب نفسه وجابلهم المنيو وكل وحدة قامت تتشرط ابي ذا وخاطري بذا وجيبولي من ذاك وعطنا ذا وهاتلنا من ذاك المهم اللبناني خذ طلباتهم وكلها دقايق والطلبات عندهم .. لك تأبريني الحساب 322 ريال البنات انهبلو كل وحدة فاغرتن فاهها ماتدري وش تقول نسو يجيبون الفلوس عاد من بيفكهم من دانه الملسونه هي ودلعها وبالفعل اطلقت بصوتها الفتان كلماتها اللاذعه:نعم نعم ماشاللللللللللللللله الحين مسحبينا من البيت ومن فجر الله لا لا وبعد بكل ثقه طاقين الشمغ والثياب وانتي ياهانم مولعتلي الزقارة على بالك ضابطة الدور الحين مسويتلها فيها واااااااخرتها مامعكم فلوووووس طبعا الاكل رجع بكل ماتشتهيه انفسهم ومسكو خط البيت وهم مطأطاين الراس وقفت عهود السيارة بمكانها وعيناها يملأها الخذلان لتلك الرحلة الفاشله ونزلو من السيارة واذا بالمؤذن يرفع كلمة الحق اللـــــــــــــــــــــــــه أكبر واذا بمشيعل والشايب يرمقونهم بنظرات ملتهبه تتطاير شررا ومن هنا انتهى مستقبل كل وحدة فيهم واخر ما سمعته عنهم ان كل وحدة انختم على جوازها وترحلت لديرتها ناهيكم عن جوالاتهم اللي انسحبت ولا عاد فيه شي اسمه ابي فلانه وابي علانه طبعا اللي كلتها مضبوووووط حصيصه لانها هي اللي بالوجه وتمت اضافت هذه الرحله لسجلاتهم الحافله بالمسرات والكفشات والهوشات.......................................... ... ..دعواتكم لهم
منقووووووووول
:cheers:
2011-02-15, 3:31 pm
